خرج للفرندة عشان يشرب سيجارته بعيد عن الأولاد ، بفانلته البيضة الداخلية . المكان برا حلو و شوية هوا كويسيين يفرفشوا ، الجناين مالية الفراغات بين العمارات ، بس يا تري في حد حاسس بالميزة دي ؟ اقعد يلف بنظراته من بلكونة للتانية في العمارة اللي قدامه ، و بعدين لف براسه للعمارة البعيدة شوية ناحية الشمال ، من بلكونة للتانية ..في واحدة قاعدة في البلكونة في الدور التاني ، يا تري عارفة انها مكشوفة للناس و لا لأ بشعرها ؟ كل شوية ألاقيها مشغولة بحاجة في البلكونة ، و كتير بتتفرج علي الشارع برضو و الجنايين و الناس اللي رايحة و جاية في المنطقة الهادية دي . و العيال اللي بتغني و راكبة عجل و بترخم علي الكلاب اللي في المنطقة و الكلاب ترخم عليهم . يا تري لو هو كان ساكن في منطقة أقل مستوي من دي، في منطقة أكثر عشوائية ، و المسافة بين العمارات حتكون أقل و مفيش جناين بس شوية أشجار بين عمارة و التانية ، و البلكونات حتكون باصة لبعضها أكتر و الأنكشاف يكون أوضح للجيران و جماهير الشارع ، كان حيفضل متابعها أكتر من كدا ، و يمكن يقدر يشوف ملامحها أكتر من كدا و يمكن يعرف تفاصيل حياتها أكتر من كدا و مش بعيد يعرف هي بتعمل ايه و بترسم ايه لما بتقعد في البلكونة ، و عينيها بتيجي علي مين في الشارع . مش بعيد .
No comments:
Post a Comment