كوكتيلة

كانت قاعدة في المواصلة ، و زحمة زحمة ، بس مفرقتش كتير لأن في زحمة برضه في دماغها . زحمة و لغبطة ، و مفيش استقرار ..افكار كتيرة شغلاها ، حتي لو افكار هايفة ، بس دماغها عمرها ما وقفت عن التفكير . 

قرفت من الناس اللي حوليها في المواصلة ، و الريحة اللي طلعة ، ناس غلابة اه بس مش معني كده ان هم مش شامين نفسه؟!!  كانت حاطة السماعة في ودنها .. بس صوت الطبل بتاع الاغاني الاجنبي جبلها صداع ، مسكت الموبايل و راحت لبرنامج  الراديو اهدي شوية ، ممكن تسمع شوية قران.. بس افتكرت انها في الانفاق .. مشتغلش .. لسه اقدمها وقت عقبال متوصل لبيتها .. و محبتش تفضل تبصبص علي الحوليها .. مش مناظر تفرح يعني ، و محبتش تسرح و تستسلم لافكرها .. مش بيودوها حتة ..خصوصا لما تبقي مضغوطة ، الدنيا تقفل زيادة كدة .. واحد بيعدي فخبط فيها .. بصتلو ورا بقرف .. مقلش حته لو مؤاخذة ..بس تلقيه مخدش باله ، حصل خير ! يا تري الناس دي عايشة ازاي ؟؟ يا تري مبسوطين ؟  هي مبسوطة في حياتها .. مفيش عقد ، بتحب تفرح  اوي ، لو ملقتش حاجة تفرحها تمل جدا ، و لو جت حاجة زعلتها ممكن تتفق مع وجهة النظر " مشاكل عشان نكسر الملل " ...  جوه شنطتها الكبيرة مصحف و كتاب . هي عاوزه تعمل حاجة مفيدة ، مبقتش عاوزة تضيع وقتها ، بس هي مش في وضع روحاني عشان تقرأ في المصحف ، و لا هي فايقة تدفسلها معلومتين جداد جوه دماغها .. 

بس هي عاوزه برضه متفكرش في اللي حصل النهاردة و اللي حيحصل بكرة .. كانت مضايقة ، حتي الحاجة اللي حاسيتها ملقيتهاش قبل كده طلعت مش كاملة ، ممكن .. هي اتعلمت حاجات .. و متعلمتش من القرصات اللي خدتها ، قالت اللي ميتقلش ، و مقلتش اللي يتقال ..الناس شايفاها  بطريقة متشابهة ، بتنبسط لان معظم الانطباعات كويسة ، بس هي فيها حاجات اتغيرت ،  و في حاجات استقرت فيها و بقت مكنونة في قلبها .

في لسه نواقص كتيره . و بالنسبلها تحب الظاهر زي الباطن ، فهي ناقصة من جوه و من بره ، هي مضايقة ، بس بتقول الحمد لله  ..

هي لسه ملغبطة و مستنية تستقر ، ممكن ميفرقش معاها اي حاجة ، بس هي مش بتحب تبيع  اي قضية .. و لو قضية خسرانه يبقي تسكت علي حالها  و تحارب .